ထူးထူးခြားခြားသေခြင်း (သို့) နောက်ဆုံးနုတ်ဆက်ခြင်း

ကာရာအိုကေ မိုက်ကရိုဖုန်း ဓါတ်ကြိုးပေါက်ပြီး သီချင်းဆိုသူ သေဆုံး
ခင်နှင်းလွင်၊ ရန်ကုန်

သြဂုတ် ၅၊ ၂၀၁၀

ဇူလိုင်လ ၂၇ရက်နေ့က လားရှိုးမြို့ ကာရာအိုကေ ဆိုင်တစ်ဆိုင်တွင် နိုင်ငံတကာအင်ဂျီအိုကြီး တစ်ခုဖြစ်တဲ့ “ကဲရ်မြန်မာ” မှ ၀န်ထမ်းတစ်ဦး မိုက်ခရိုဖုန်းဓါတ်ကြိုး ပေါက်ပြီး ဓါတ်လိုက်သေဆုံး ခဲ့ရတယ်လို့ သိရပါတယ်။ ဖြစ်ပွားပုံမှာ အဆိုပါနေ့က အန်ဂျီအိုဝန်ထမ်းများ လားရှိုးမြို့ “သီရိရွှေစင်ကာရာအိုကေဆိုင်” တွင် သီချင်းသွားရောက် သီဆိုကြစဉ် သီချင်းဆိုသည့် မိုက်ဝါယာကြိုးပေါက်ရာမှ ဓါတ်လိုက်သေဆုံးခဲ့တာ ဖြစ်ပါတယ်။

အဆိုပါ အန်ဂျီအိုမှ ၀န်ထမ်းတဦးက

“အဲဒီနေ့က ပရောဂျက် နောက်ဆုံးပိတ်တဲ့ရက်ဖြစ်လို့ နှုတ်ဆက်ပွဲ အနေနဲ့ အားလုံး ကာရာအိုကေ သွားဆိုကြတာပါ။ သေဆုံးသွားသူရဲ့ အမည်က စောမားကပ်ဖရီးဒန်း ပါ။ အသက်က၂၇နှစ်၊ FOC ( Field office coordinator ) တာဝန်ယူထားတဲ့သူပါ။ သူဓါတ်လိုက်ပြီးတော့ လက်တဖက်က မီးကျွှမ်းသလို ညိုမဲနေပါတယ်။ လောလောဆယ် ကာရာအိုကေဆိုင်က နစ်နာမှုအတွက်လျော်ကြေး သိန်းလေးဆယ် ပေးမယ်လို့ သဘောတူထားပေမဲ့ အခုနောက်ဆုံးသတင်းအရ သူတို့ဘက်က ငွေပေးဖို့ကို အကြောင်းအမျိုးမျိုးပြပြီး ငြင်းနေတယ်လို့ သိရတယ်”
လို့ ပြောဆိုပါတယ်။

စောမားကပ် ဖရီးဒန်းမှာ ကျိုင်းတုံမြို့၊ ၄ ရပ်ကွက် နွဲ့နောရပ်မှာ နေထိုင်သူပါ။ သူ့မှာ မိခင်နှင့် ညီငယ် နှစ်ယောက်ကျန်ခဲ့တယ်လို့ သိရပါတယ်။

ရန်ကုန်မြို့ခံတဦးဖြစ်သူ မနှင်းပွင့်က -

“သမီးတို့ သူငယ်ချင်းတွေ ဂိမ်းစီးတီးမှာ ကာရာအိုကေ သွားဆိုကြတာ … မိုက်က ဘယ်နေရာက ပေါက်နေလဲမသိဘူး။ မိုက်ကို ကိုင်လိုက်တာနဲ့ လက်က ကျင်တက်နေတယ်၊ ဆိုင်တွေ အနေနဲ့ ၀န်ဆောင်မှုပေးရာမှာ ကိုယ့်ဖောက်သည်တွေ အသက် အန္တရာယ် မကြုံရအောင်တော့ ဂရုစိုက်သင့်တယ်”

လို့ ရန်ကုန်က သူ့အတွေ့အကြုံကို ပြောပြပါတယ်။

စင်္ကာပူမှာ အလုပ်လုပ်ကိုင်နေသူတစ်ဦး ကလည်း

“မြန်မာနိုင်ငံမှာ လုပ်ငန်းခွင်အန္တရာယ် ကြိုတင်ကာကွယ်တာ၊ ပြုပြင်ထိန်းသိမ်းမှု လုပ်တာမျိုးတွေ တော်တော်လေး အားနည်းတာတွေ့ရတယ်၊ နောက်ပြီး လျော်ကြေးကျတော့လဲ တကယ်ရဖို့ အာမခံချက် မရှိဘူး။ အစိုးရဘက်ကလဲ ဒီလိုကိစ္စတွေကို အချင်းချင်းညှိနှိုင်းဖို့ပဲ ပြောတာများတယ်။ နောက်ခံ အင်အား မရှိတဲ့ သူတွေအဖို့တော့ ဘာမှရမှာမဟုတ်ဘူး”

လို့ ဝေဖန်ပြောဆိုပါတယ်။

မြန်မာနိုင်ငံတွင် စားသုံးသူအခွင့်အရေး ကာကွယ်ရေး ကဲ့သို့သောလှုပ်ရှားမှုများကိုလည်း အသိပညာပေး ဆောင်ရွက်ခွင့် မရှိဘဲ ထိုသို့သောလှုပ်ရှားမှုများအား စစ်အစိုးရက နိုင်ငံရေးအမြင်ဖြင့် ရှုမြင်ပြီး ကုန်ထုတ်လုပ်သူ၊ ၀န်ဆောင်သူများဖြစ်သည့် လုပ်ငန်းရှင်များအား ကာကွယ်ပေးလိုသည့် ရည်ရွယ်ချက်လည်း ရှိနေသည်ဟု ပြည်တွင်း သတင်းအယ်ဒီတာတဦးက ပြောပါတယ်။ ထို့ပြင် ဒုတိယအချက် အနေဖြင့် ယုံကြည်အားကိုးလောက်သည့် တရားစီရင်ရေး စနစ်မရှိခြင်းကြောင့်လည်း နစ်နာသူအနေဖြင့် တရားစွဲဆိုဖို့ရာ ၀န်လေးကြသည့် အခြေအနေဟု လည်းဖြည့်စွက်ပြောဆိုပါတယ်။

ယမန်နှစ်က ခွဲစိတ်ဆရာဝန်ကြီး တဦးပေါ့လျော့မှုကြောင့် ၉ တန်းကျောင်းသူ မခိုင်ရွှန်းလဲ့ရည်သေဆုံးခဲ့ရမှုတွင် မီဒီယာများမှ ဖေါ်ပြခဲ့မှုကြောင့်သာ ပေါ့လျော့သည့် ဆရာဝန်ကြီးနှင့် ရွှေဂုံတိုင် အထူးကုဆေးရုံတို့မှ လျော်ကြေးပေးခဲ့ရပြီး အဆိုပါ အဲဒီနောက်မှာ အလားတူဖြစ်ရပ်မျိုး ပြည်တွင်းမီဒီယာများမှာ ဖေါ်ပြခွင့် မရတော့တာ တွေ့ရပါတယ်။

ဇူလိုင် ၂၃ရက်နေ့ ကလည်း ဒဂုံစင်တာ ဘီဘလောက်တွင် လျှပ်စစ်မီးပြတ်တောက်မှုကြောင့် ဓါတ်လှေကား ရပ်တန့်သွားရာမှ စီးနင်းလာသူ (၈) ဦး တို့ ဓါတ်လှေကားထဲ၌ ၄၈ မိနစ်ကြာ ပိတ်မိနေခဲ့တဲ့ အဖြစ်အပျက်နှင့် ကြုံတွေ့ခဲ့ရသည်။ ထိုသို့ပိတ်မိနေစဉ်မှာ သာမန် လုံခြုံရေးဝန်ထမ်း ၂ ဦးမှ လွဲပြီး အဓိက တာဝန်ရှိတဲ့ Dagon International Ltd ပိုင်ရှင် သို့မဟုတ် အုပ်ချုပ်ရေးမှူးတို့ တဦးတယောက်မှ မလာရောက်ခဲ့ဟု Hot News အပတ်စဉ် ဂျာနယ်တွင် ရေးသား ဖေါ်ပြထားသည်ကို တွေ့ရသည်။

ပိတ်မိနေသူများ ဘေးမသီ ရန်မခရအောင် ဆုံးဖြတ်စီစဉ်နိုင်သူ တဦးတယောက်မှ ကူညီဆောင်ရွက်ခဲ့ခြင်း အလျဉ်းမရှိတာကို တွေ့ရတယ်လို့လည်း အဆိုပါစာစောင်မှာ ဖော်ပြထားပါတယ်။
Copy from www.moemaka.com